مسکرانے کی وجوہات
*قسط چہارم: کسی کی بے لوث محبت*

زندگی میں کچھ لوگ ایسے ہوتے ہیں جن کی موجودگی ہی دل کو خوش کر دیتی ہے۔ ان کے پاس بیٹھ کر کسی خاص موضوع پر گفتگو کرنا ضروری نہیں ہوتا، نہ ہی ہر ملاقات میں کوئی نئی بات ہونی چاہیے۔ بس ان کا ساتھ اچھا لگتا ہے۔ وہ حال پوچھتے ہیں تو محسوس ہوتا ہے کہ واقعی ہماری خیریت جاننا چاہتے ہیں، وہ کوئی بات یاد رکھتے ہیں تو دل خوش ہو جاتا ہے، اور کبھی ہماری معمولی سی پریشانی پر فکر مند ہو جائیں تو اندازہ ہوتا ہے کہ ہم کسی کے لیے اہم بھی ہیں۔

عجیب بات ہے کہ انسان کو ہمیشہ بڑی بڑی مہربانیاں یاد نہیں رہتیں، کبھی کسی کا ایک چھوٹا سا جملہ بھی دل میں گھر کر لیتا ہے۔ مشکل وقت میں کسی نے کہہ دیا کہ ’’فکر نہ کرو، سب ٹھیک ہو جائے گا‘‘، کسی نے خاموشی سے ساتھ دے دیا، یا کسی نے ہماری غیر موجودگی میں بھی ہمارا خیال رکھا، ایسی باتیں بظاہر معمولی ہوتی ہیں، مگر جب یاد آتی ہیں تو لبوں پر مسکراہٹ بکھر جاتی ہے۔ اس لیے نہیں کہ مسئلہ حل کرنے کے لیے کسی نے بہت کچھ کر دیا، بلکہ اس لیے کہ مشکل وقت میں ہم خود کو تنہا نہیں سمجھے۔

بے لوث محبت کی سب سے خوب صورت بات یہی ہے کہ اس میں حساب کتاب نہیں ہوتا۔ کوئی شخص ہماری خوشی میں خوش ہوتا ہے، ہماری کامیابی پر دل سے مبارک باد دیتا ہے اور ہماری ناکامی کے وقت ہمیں حقیر سمجھنے کے بجائے حوصلہ دیتا ہے۔ ایسے لوگ زندگی میں بہت قیمتی ہوتے ہیں۔ ان کی محبت کا احساس کبھی اچانک کسی یاد کے ذریعے تازہ ہو جاتا ہے اور انسان بے اختیار مسکرا اٹھتا ہے۔

کبھی کبھی مسکرانے کی وجہ کوئی خوش خبری نہیں ہوتی، بس یہ احساس ہوتا ہے کہ اس دنیا میں کوئی ایسا بھی ہے جس کے دل میں ہمارے لیے جگہ ہے۔۔۔۔۔۔۔۔*جاری*

★ “نتیجۂ فکر:”
محمد انس رضا حاؔمی

Scan this QR code to read online: