مسکرانے کی وجوہات
*قسط سوم: بچپن کی یادیں*

بعض اوقات آدمی تنہا بیٹھا ہوتا ہے، نہ کوئی اس سے بات کر رہا ہوتا ہے اور نہ ہی کوئی خاص بات پیشِ نظر ہوتی ہے، لیکن اچانک اس کے لبوں پر مسکراہٹ آ جاتی ہے۔ وجہ پوچھی جائے تو شاید وہ خود بھی فوراً نہ بتا سکے، مگر حقیقت یہ ہوتی ہے کہ ذہن اسے ماضی کی کسی گلی میں لے گیا ہوتا ہے، جہاں بچپن کی کوئی شرارت یا کسی بزرگ کی شفقت بھری بات اس کی منتظر ہوتی ہے۔

بچپن بھی کیا خوب زمانہ تھا! چند روپے مل جائیں تو خوشی کا ٹھکانہ نہ رہے، دوست کے ساتھ کھیلنے کا موقع مل جائے تو دن بن جائے، اور کسی معمولی سی بات پر ناراضی ہو جائے تو یوں محسوس ہو جیسے بہت بڑا نقصان ہوگیا ہو۔ آج انہیں باتوں کو یاد کرکے ہنسی آتی ہے کہ ہم بھی کتنی چھوٹی چھوٹی باتوں پر خوش اور اداس ہو جایا کرتے تھے۔ مگر شاید اسی میں اس زمانے کی خوب صورتی تھی کہ خوش ہونے کے لیے بہت کچھ درکار نہیں ہوتا تھا۔

پھر وہ دوست بھی یاد آتے ہیں جن کے ساتھ کبھی روز ملاقات ہوتی تھی، مگر اب مدتوں بات نہیں ہوتی۔ وہی دوست جن کے ساتھ معمولی سی شرارت بھی ایک یادگار واقعہ بن جاتی تھی۔ آج ان کا نام سن کر بھی چہرے پر مسکراہٹ آ جاتی ہے۔ وقت گزر جاتا ہے، لوگ اپنی اپنی زندگی میں مصروف ہو جاتے ہیں، مگر بعض یادیں ایسی ہوتی ہیں جن پر وقت کی گرد نہیں جمتی۔

شاید بچپن کی یادیں اس لیے مسکراہٹ لے آتی ہیں کہ ان میں ہم اپنی زندگی کا وہ زمانہ دیکھتے ہیں جب خوشیاں چھوٹی تھیں، مگر دل انہیں محسوس کرنے کے لیے بہت بڑا تھا۔۔۔۔۔۔*جاری*

★ “از:”
محمد انس رضا حاؔمی

Scan this QR code to read online: