امت کے لیے مفید کتاب: حلالہ اور طلاقِ ثلاثہ کا شرعی و عقلی تجزیہ*
مصنف: مولانا مجتبیٰ رضا مرکزی حفظہ اللہ تعالیٰ (سیتا مڑھی، بہار)

آج کے دور میں ”حلالہ“ ایک متنازع موضوع بن چکا ہے۔ بعض لوگ اسے عورت کے ساتھ ظلم سمجھتے ہیں اور اسلام پر تنقید کرتے ہیں، جبکہ حقیقت اس کے برعکس ہے۔ اسلام نے حلالہ کا تصور عورت کے تحفظ، مرد کی ذمہ داری، اور نکاح کے تقدس کو برقرار رکھنے کے لیے دیا ہے۔ یہ کوئی وقتی جذبات پر مبنی فیصلہ نہیں بلکہ عقل، حکمت اور فطرت کے عین مطابق قانون ہے۔ حلالہ سے جو باتیں سمجھ میں آتی ہیں وہ یہ ہیں:

*[١] جذباتی طلاق کے دروازے بند کر دینا، عورت کا تحفظ:*
بسا اوقات مرد غصے یا جذبات میں آ کر تین طلاقیں دے دیتا ہے، پھر پچھتاتا ہے، اور چاہتا ہے کہ بیوی واپس مل جائے۔ اگر حلالہ کا قانون نہ ہو، تو مرد کو عورت کے ساتھ بار بار کھیلنے کی کھلی چھوٹ مل جائے گی۔ غصے میں طلاق، پھر رجوع، پھر طلاق، ایک دائرہ بن جائے گا جس میں سب سے زیادہ متأثر عورت ہی ہوگی۔ جب مرد جانتا ہو کہ تین طلاقوں کے بعد فوری رجوع ممکن نہیں اور بیوی صرف اسی وقت واپس آ سکتی ہے جب وہ کسی اور شخص سے حقیقی نکاح کر کے پھر طلاق پائے، تو وہ طلاق دینے سے پہلے ہزار بار سوچے گا۔ اس سے عورت کے مقام، عزت اور مستقبل کا تحفظ ہوتا ہے۔

*[٢] نکاح کو مذاق بننے سے روکنا، معاشرتی توازن:*
اگر بغیر حلالہ کے طلاق کے بعد فوراً رجوع کی اجازت ہو تو نکاح و طلاق ایک کھیل بن کر رہ جائیں۔ مرد اپنی بیوی کو دباؤ میں لانے کے لیے بار بار طلاق دے سکتا ہے، کیونکہ اسے معلوم ہے کہ جب چاہے رجوع کر سکتا ہے۔ نتیجتاً نکاح کی حرمت ختم ہو جائے گی۔ اسلام نے حلالہ کے ذریعے طلاق کے عمل کو سنجیدہ اور بامقصد بنایا ہے تاکہ نکاح و طلاق دونوں اپنی اصل اہمیت پر قائم رہیں۔ اس سے معاشرے میں خاندانی نظام مستحکم ہوتا ہے اور عورت کا رشتہ بازیچہ اطفال نہیں بنتا۔

*[٣] مرد کی ذمہ داری کا احساس، عورت کی عزت کا تقاضا:*
جب مرد کو معلوم ہو کہ طلاق کے بعد بیوی کو واپس لانا آسان نہیں، بلکہ وہ کسی اور کے نکاح میں چلی جائے گی، تو وہ طلاق دینے سے پہلے اپنی ذمہ داری کا احساس کرے گا۔ اس سے خاندان بچ سکتا ہے اور عورت کا گھر ٹوٹنے سے محفوظ رہتا ہے۔ حلالہ کا قانون دراصل مرد کو لاپرواہی سے طلاق دینے سے روکتا ہے۔ یہ عورت کی عزت و وقار کی حفاظت کے لیے ہے تاکہ وہ مرد کی بے پروائی کا شکار نہ بنے۔ مرد کو طلاق سے پہلے سوچنے پر مجبور کرنا، درحقیقت عورت کے حق میں سب سے بڑا انصاف ہے۔

اظہر من الشمس بات ہے کہ اسلام کا کوئی بھی قانون بے مقصد یا ظالمانہ نہیں۔ حلالہ کا قانون جذباتی فیصلوں کو روکنے، نکاح کے تقدس کو قائم رکھنے، اور عورت کے حقوق کی حفاظت کے لیے ہے۔ اگر اس قانون کو سمجھ بوجھ، عقل اور عدل کی روشنی میں دیکھا جائے تو یہ ظلم نہیں بلکہ عورت کے ساتھ سب سے بڑا انصاف ہے۔ البتہ اس میں بے جا یا جعلی حلالہ (جسے ”حلالہ کا ڈرامہ“ کہا جا سکتا ہے) ہر صورت ناجائز ہے اور اسلامی شریعت کے خلاف ہے۔

حلالہ کی حقیقت اور نکاحِ ثلثہ کا شرعی و عقلی تجزیہ کیا ہے ؟ اس بہترین موضوع پر جامعۃ الرضا سے فارغ ہونے والے فاضل محترم حضرت مولانا مجتبیٰ رضا صاحب حفظہ اللّٰہ تعالیٰ نے قلم اٹھایا ہے۔ میری نظر میں یہ رسالہ اس سال آنے والے تمام رسالوں میں سب سے الگ اور ضروری للامۃ ہے، میں ہمیشہ سے چاہتا تھا کہ اس موضوع پر کوئی ضرور قلم اٹھائے اور یہ کام مولانا مجتبیٰ رضا مرکزی صاحب حفظہ اللّٰہ تعالیٰ نے کر دکھایا۔ رسالہ کے نام سے معلوم چلتا ہے کہ رسالہ میں تمام تر پہلوؤں کا بیان موجود ہے۔ ان شاء اللّٰہ تعالیٰ فقیرِ بے توقیر جب رسالہ کا مطالعہ کرے گا تب ایک اور مضمون میں مزید معلومات پیش کرے گا۔

بہر حال! یہ رسالہ امت کے لیے بہت مفید ہے۔ اسلام پر اٹھتی ہوئی انگلیوں کو توڑ دینے والا اور اسلام کی عظمت کو بیان کرنے والا رسالہ لکھنے پر یہ فقیرِ بے توقیر مولانا مجتبیٰ رضا مرکزی حفظہ اللّٰہ تعالیٰ کو تہ دل سے مبارکبادی پیش کرتا ہے اور امید کرتا ہے کہ رسالہ میں ہر پہلو اسلام کی عظمت بیان کرے گا۔ اللّٰہ تعالیٰ کتاب کو قبول فرمائے، مقبولِ خواص و عوام بنائے، امت اس رسالہ سے فائدہ حاصل کرے، امت کے ایمان و عقیدے کی مضبوطی کا یہ رسالہ ذریعہ بنے، آمین ثم آمین یا رب العٰلمین بجاہ النبی الامین الکریم صلی اللّٰہ تعالیٰ علیہ وسلم۔ کتاب حاصل کرنے کے لیے رابطہ فرمائیں: 9870875343

★از: محمد انس رضا حاؔمی برکاتی
شاہین باغ، ابوالفضل انکلیو-2، اوکھلا، جامعہ نگر، نئی دہلی
٣١؍جولائی ؁٢٠٢٥ء

Scan this QR code to read online: