ذہن کے شور میں گم آدمی۔۔۔۔۔۔!

ہمارے اندر بھی ایک دنیا آباد ہوتی ہے؛ خیالوں، خواہشوں، اندیشوں اور یادوں کی دنیا۔ بظاہر ہم خاموش بیٹھے ہوتے ہیں، مگر ہمارے اندر نہ جانے کتنے مکالمے جاری ہوتے ہیں۔ کبھی ماضی کی کوئی تلخ یاد اپنی گرفت میں لے لیتی ہے، کبھی مستقبل کا کوئی انجانا خوف سکون چھین لیتا ہے، اور کبھی حال کی الجھنیں اس قدر گھیر لیتی ہیں کہ ہم اپنے ہی وجود سے بے خبر ہو جاتے ہیں۔

عجیب بات ہے کہ ہم دوسروں کے سوالوں کے جواب دیتے دیتے اپنے سوالوں میں الجھ جاتے ہیں۔ ہم لوگوں کے سامنے مسکراتے ہیں، روزمرہ کے کام انجام دیتے ہیں، زندگی کی رفتار کے ساتھ چلنے کی کوشش بھی کرتے ہیں، مگر ذہن میں خیالات کا ایک ہجوم ہوتا ہے جہاں کسی ایک خیال کو ٹھہر کر سمجھنا دشوار ہو جاتا ہے۔ ہمیں آرام کی ضرورت ہوتی ہے، مگر ذہن آرام نہیں کرنے دیتا۔ سکون چاہیے ہوتا ہے، مگر ہم سکون کی تلاش میں مزید الجھتے چلے جاتے ہیں۔

ذہنی تھکن کی ایک وجہ یہ بھی ہے کہ ہم ہر سوال کا جواب فورا، ہر مسئلے کا حل ایک ساتھ اور ہر اندیشے سے نجات ایک ہی لمحے میں چاہتے ہیں۔ ہم بھول جاتے ہیں کہ زندگی کے بعض معاملات وقت مانگتے ہیں، کچھ سوالوں کے جواب تجربہ دیتا ہے اور بعض راستے پیش قدمی کے بعد ہی دکھائی دیتے ہیں۔

ایسے میں ضروری ہے کہ ہم اپنے ذہن کے ہر خیال کو حقیقت اور ہر اندیشے کو آنے والے کل کا فیصلہ نہ سمجھیں۔ کچھ باتوں کو وقت پر چھوڑ دینا، کچھ توقعات کا بوجھ ہلکا کر لینا اور کچھ دیر اپنے حال میں جینا بھی زندگی سیکھنے کا حصہ ہے۔ ہر الجھن کو اسی وقت سلجھانا ضروری نہیں، جس وقت وہ پیدا ہو۔ کبھی ذہن کو مہلت دینا بھی مسئلے کے حل کا رہنما ہو جاتا ہے۔

*کیونکہ زندگی صرف سوچتے رہنے کا نام نہیں، اسے جینے کے لیے بھی ذہن میں کچھ خاموشی، دل میں کچھ گنجائش اور خود پر کچھ اعتماد باقی رکھنا ضروری ہے۔*
(ماخوذ از نجمیؔ کی ڈائری ۲۸ مئی ۲۰۲۴ء)

Scan this QR code to read online: