سکون کیسے حاصل کریں؟ (قسط 10)

#تیسرا سبق: استغفار اور سکون

تیسرے دن، مولوی غلام رسول نے کہا: بیٹا، گناہ دل کا بوجھ بڑھاتے ہیں۔ استغفار سے سکون ملتا ہے۔
نبی صلی اللہ علیہ وسلم نے فرمایا:
“منْ لَزِم الاسْتِغْفَار، جَعَلَ اللَّه لَهُ مِنْ كُلِّ ضِيقٍ مخْرجًا، ومنْ كُلِّ هَمٍّ فَرجًا، وَرَزَقَهُ مِنْ حيْثُ لاَ يَحْتَسِبُ”
(ابو داؤد)
جو استغفار کو لازم پکڑے، اللہ اسے ہر غم سے نجات اور ہر تنگی سے راستہ دے گا، اور اسے ایسی جگہ سے رزق عطا کرے گا جہاں سے اسے گمان بھی نہ ہو۔

ایک بار حضرت یونس علیہ السلام مچھلی کے پیٹ میں قید ہو گئے۔ وہاں اندھیرا تھا، تنہائی تھی، لیکن انہوں نے استغفار کیا: “لَآ اِلٰهَ اِلَّاۤ اَنْتَ سُبْحٰنَكَ اِنِّیْ كُنْتُ مِنَ الظّٰلِمِیْنَ” (سورۃ الانبیاء: 87)۔ اللہ نے انہیں نجات دی۔

عرفان نے سوچا کہ اس نے کتنی بار غصے میں ماں سے بدتمیزی کی، کتنی بار نماز چھوڑی۔ اس نے کہا: نانا، میں نے بہت غلطیاں کیں۔
مولوی غلام رسول نے کہا: بیٹا، اب استغفار کر۔ نبی صلی اللہ علیہ وسلم دن میں ستر بار استغفار کرتے تھے، حالانکہ آپ ﷺ معصوم تھے۔ (صحیح بخاری)۔

عرفان نے اس دن “لَآ اِلٰهَ اِلَّا اَنْتَ سُبْحٰنَكَ اِنِّیْ كُنْتُ مِنَ الظّٰلِمِیْنَ” کہنا شروع کیا۔ ہر بار جب وہ یہ کہتا، اسے لگتا کہ اس کا دل ہلکا ہو رہا ہے۔
(جاری)

📝 شعیب خان نجمیؔ

Scan this QR code to read online: