خود شناسی کے چند لمحے

✍️ محمد شعیب خان نجمیؔ مرکزی

لوگوں پر حد سے زیادہ اعتماد انسان کو کمزور کر دیتا ہے؛ نہ جانے کون کب ساتھ چھوڑ دے، کون سا تعلق وقت کی ایک کروٹ پر اپنی معنویت کھو بیٹھے۔ اس لیے ہر تعلق کو زندگی کی ضرورت سمجھ لینا دانش مندی نہیں۔ بعض اوقات کسی کی ہمنشینی سے بہتر گوشۂ تنہائی ہوتا ہے، جہاں انسان دوسروں کی توقعات اور رعایتوں سے بے نیاز ہو کر خود کو سننے کا موقع پاتا ہے۔

دوسروں کے دل رکھنے، ان کے مزاج نبھانے اور ہر تعلق کو قائم رکھنے کی کوشش میں انسان اکثر اپنی خواہشات، اپنی ترجیحات اور بالآخر اپنی ذات کو نظرانداز کر دیتا ہے۔ دوسروں کے لیے جیتے جیتے ایک وقت ایسا آتا ہے جب آدمی اپنے ہی وجود میں اجنبی محسوس ہونے لگتا ہے۔
تنہائی ہمیشہ محرومی نہیں؛ کبھی یہ خود شناسی کا موقع بھی ہوتی ہے۔ انسان کو کبھی کبھی لوگوں سے نہیں، اپنے آپ سے تعلق مضبوط کرنے کی ضرورت ہوتی ہے؛ کیونکہ دنیا سے نبھائے گئے تمام رشتوں سے پہلے اپنی ذات سے وفادار رہنا ضروری ہے۔
(ماخوذ از نجمیؔ کی ڈائری، ۱۲ نومبر ۲۰۲۵)